Sa simula ng ika-20 na siglo, nagkaroon ng pag-unlad sa kilusan ng mga kababaihan (Hega et al., 2017). Itinatag ang unang peministang asosasyon, ang Asociacion Feminista Filipina ni Concepcion Felix de Calderon. Nagtaguyod ito ng programa na tinutugunan ang kalusugan ng mga kababaihan at kabataan lalo na sa mga nasa laylayan. Nabuo rin ang Asociacion Feminista Ilonga sa pamumuno ni Pura Villanueva-Kalaw na ipinaglaban ang karapatan sa pagboto ng mga kababaihan.

Sa ilalim naman ng pananakop ng mga Hapones, maraming kababaihan ang mga naging biktima ng pagiging comfort women ngunit may mga nakilahok sa armadong pakikibaka laban sa Hapon (Hega et al., 2017). Isang halimbawa ay si Felipa Culala alyas Dayang-dayang. Pinangunahan niya ang isa sa mga pinakaunang puwersa ng gerilya laban sa mga Hapones bilang bahagi ng HUKBALAHAP kung saan matagumpay na nagsagawa ang mga ito ng ambush.

Ipinababatid ng mga nasalaysay na sa kabila ng opresyon sa mga kababaihan, matatagpuan pa rin sila sa unahan na lumalaban (Hega et al., 2017).